സി എന്‍ എ-
ഹൈദരാബാദ്:
'ബാഹുബലി'ക്ക് ശേഷം എസ്.എസ്. രാജമൗലി സംവിധാനം ചെയ്യുന്ന 'RRR' എന്ന ബ്രഹ്മാണ്ഡ ചിത്രത്തിലെ ബോളിവുഡ് താരം ആലിയ ഭട്ടിന്റെ ലുക്ക് പുറത്ത് വിട്ടു.
ജൂനിയര്‍ എന്‍.ടി.ആറും, രാം ചരണുമാണ് ചിത്രത്തില്‍ പ്രധാന വേഷങ്ങളില്‍ എത്തുന്ന 'RRR'ല്‍ സീതയുടെ കഥാപാത്രത്തെയാണ് ആലിയ അവതരിപ്പിക്കുന്നത്.
ജൂനിയര്‍ എന്‍.ടി.ആര്‍. കൊമരു ഭീം ആയും രാം ചരണ്‍ അല്ലൂരി സീതരാമ രാജുവായിട്ടുമാണ് ചിത്രത്തില്‍ എത്തുന്നത്.
രുധിരം, രൗദ്രം, രണം എന്നാണ് 'RRR' എന്ന പേര് കൊണ്ട് ഉദ്ദേശിക്കുന്നത്. 'RRR' ചരിത്രവും ഫിക്ഷനും കൂട്ടിചേര്‍ത്ത ചിത്രമാണ്. കൊമരു ഭീം, അല്ലൂരി സീതരാമ രാജു തുടങ്ങിയ സ്വാതന്ത്ര്യ സമര സേനാനികളുടെ സാങ്കല്‍പ്പിക കഥയാണ് ചിത്രം.
450 കോടി മുതല്‍മുടക്കില്‍ ഒരുങ്ങുന്ന ചിത്രത്തില്‍ അജയ് ദേവ്ഗണ്‍, സമുദ്രക്കനി, ഒലിവിയ മോറിസ്, അലിസണ്‍ ഡൂഡി, റേ സ്റ്റീവന്‍സണ്‍ തുടങ്ങി തെന്നിന്ത്യയില്‍ നിന്നും ബോളിവുഡില്‍ നിന്നുമുള്ള വന്‍ താരനിരതന്നെ ഈ ബിഗ്ഗ് ബജറ്റ് ചിത്രത്തില്‍ അണിനിരക്കുന്നുണ്ട്.
ഡി.വി.വി. ദാനയ്യയാണ് ചിത്രത്തിന്റെ നിര്‍മ്മാതാവ്. ഛായാഗ്രഹണം- കെ.കെ. സെന്തില്‍കുമാര്‍, സംഗീതം- എം.എം. കീരവാണി.
10 ഭാഷകളിലാകും ചിത്രം റിലീസിനെത്തുക. 2021ല്‍ തന്നെ സിനിമ റിലീസ് ചെയ്യുമെന്ന പ്രതീക്ഷയിലാണ് അണിയറപ്രവര്‍ത്തകര്‍. എന്നാല്‍ നിലവിലെ സാഹചര്യമനുസരിച്ച് റിലീസ് തീയതി പ്രഖ്യാപിച്ചിട്ടില്ല.
