സി എന്‍ എ-
മുംബൈ:
ബോളിവുഡില്‍ നടനും സംവിധായകനും നിര്‍മ്മാതാവുമായിരുന്ന രാജീവ് കപൂര്‍ (58) അന്തരിച്ചു. ഹൃദയാഘാതത്തെ തുടര്‍ന്നാണ് അന്ത്യം. ബോളിവുഡിലെ പ്രമുഖ നടനും സംവിധായകനുമായ രാജ് കപൂറിന്റെയും കൃഷ്ണ രാജ് കപൂറിന്റെയും മകനാണ് ഇദ്ദേഹം. ഋഷി കപൂറിന്റേയും രണ്‍ദീര്‍ കപൂറിന്റേയും സഹോദരന്‍ കൂടിയാണ്.
1983 ല്‍ പുറത്തിറങ്ങിയ 'ഏക് ജാന്‍ ഹേന്‍ ഹും' എന്ന ചിത്രത്തിലൂടെയാണ് രാജീവ് കപൂര്‍ സിനിമയില്‍ അരങ്ങേറ്റം കുറിച്ചത്. പിതാവിന്റെ അവസാന സംവിധാന സംരംഭമായ 'രാം തേരി ഗംഗ മൈലി' എന്ന ചിത്രത്തില്‍ പ്രധാനകഥാപാത്രത്തെ അവതരിപ്പിച്ചു. 'ആസ്മാന്‍', 'ലൗ ബോയ്', 'സബര്‍ദസ്ത്', 'ഹം തോ ചലേ പര്‍ദേശ്' തുടങ്ങിയവയാണ് പ്രധാന ചിത്രങ്ങള്‍. 1996 ല്‍ പുറത്തിറങ്ങിയ 'പ്രേംഗ്രന്ഥ്' എന്ന ചിത്രം നിര്‍മ്മിക്കുകയും സംവിധാനം ചെയ്യുകയും ചെയ്തു. ഫാഷന്‍ ഡിസൈനറും ആര്‍ക്കിടെക്ടുമായ ആരതി സബര്‍വാളായിരുന്നു രാജീവ് കപൂറിന്റെ മുന്‍ഭാര്യ. 2001 ല്‍ വിവാഹിതരായ ഇവര്‍ 2003 ല്‍ വേര്‍പിരിഞ്ഞു.
രാജീവ് കപൂറിന്റെ സഹോദരന്‍ രണ്‍ദീര്‍ കപൂറാണ് മരണ വാര്‍ത്ത സോഷ്യല്‍ മീഡിയയിലൂടെ പുറത്തുവിട്ടത്.
'എനിക്ക് എന്റെ ഇളയ സഹോദരന്‍ രാജീവിനെ നഷ്ടമായി. അവന്‍ ഇപ്പോള്‍ ഇല്ല. ഡോക്ടര്‍മാര്‍ പരമാവധി ശ്രമിച്ചെങ്കിലും അദ്ദേഹത്തെ രക്ഷിക്കാനായില്ല. ഞാന്‍ ആശുപത്രിയില്‍ ഉണ്ട്, അദ്ദേഹത്തിന്റെ മൃതദേഹത്തിനായി കാത്തിരിക്കുന്നു.' എന്നാണ് രണ്‍ദീര്‍ കപൂര്‍ ഇന്‍സ്റ്റാഗ്രാമില്‍ കുറിച്ചത്.
