സി എന്‍ എ-
മുംബൈ:
പ്രശസ്ത ബോളിവുഡ് സംവിധായകന് രാം ഗോപാല്‍ വര്‍മ്മക്കെതിരെ ഗുരുതര ആരോപണങ്ങള്‍ ഉന്നയിച്ചുകൊണ്ട് ഫെഡറേഷന്‍ ഓഫ് വെസ്റ്റ് ഇന്ത്യന്‍ സിനി എംപ്ലോയീസ്, ആജീവനാന്ത വിലക്ക് ഏര്‍പ്പെടുത്തി.
32 യൂണിയനുകള്‍ ഉള്‍പ്പെടുന്ന വിശാലമായ സംഘടനയാണിത്. ആര്‍ട്ടിസ്റ്റുകള്‍ക്കും ടെക്നീഷ്യന്മാര്ക്കും പ്രതിഫലം നല്‍കാതിരുന്നതിനെ തുടര്‍ന്നാണ് നടപടി. 1.25 കോടി രൂപ നല്‍കാനുണ്ടെന്നും പണം നല്‍കുന്നതുമായി ബന്ധപ്പെട്ട് പലതവണ സംവിധായകന് കത്ത് അയച്ചെന്നും എന്നാല്‍ കൈപ്പറ്റാന്‍ തയാറായില്ലെന്നുമാണ് എഫ്.ഡബ്ല്യൂ.ഐ.സി.ഇ. പറയുന്നത്.
വിലക്ക് ഏര്‍പ്പെടുത്തുന്നതിന് മുന്‍പ് പണം അടയ്ക്കണമെന്ന് അറിയിച്ചു കൊണ്ട് നിയമപരമായി നോട്ടീസ് നല്‍കിയെന്നും അവര്‍ വ്യക്തമാക്കി.
പാവപ്പെട്ട ടെക്നീഷ്യന്മാര്ക്കും ആര്‍ട്ടിസ്റ്റിനും ജോലിക്കാര്‍ക്കും നല്‍കാനുള്ള പണം അദ്ദേഹം നല്‍കണമെന്നു മാത്രമാണ് തങ്ങളുടെ ആവശ്യം. ഇതിന്റെ ഭാഗമായി ഗോവ മുഖ്യമന്ത്രിക്കും കത്ത് അയച്ചിരുന്നു. പണം നല്‍കാത്ത പക്ഷം ഭാവിയില്‍ അദ്ദേഹത്തോടൊപ്പം സഹകരിക്കില്ലെന്നും തീരുമാനിച്ചു.
ഇന്ത്യന്‍ മോഷന്‍ പിക്‌ചേഴ്‌സ് പ്രൊഡ്യൂസേഴ്സ്, പ്രൊഡ്യൂസേഴ്സ് ഗൈഡ് ഓഫ് ഇന്ത്യ ഉള്‍പ്പടെയുള്ള മറ്റ് യൂണിയനുകളേയും വിവരം അറിയിച്ചിട്ടുണ്ടെന്നും സംഘടന ഭാരവാഹികള്‍ പറഞ്ഞു.
അതേ സമയം തന്റെ പുതിയ സിനിമയുടെ പ്രവര്‍ത്തനങ്ങളുമായി മുന്നോട്ട് പോകുകയാണ് രാംഗോപാല്‍ വര്‍മ്മ. കരിയറിലെ സ്വപ്‌ന പദ്ധതിയുടെ ഫസ്റ്റ് ലുക്ക് പോസ്റ്റര്‍ ജനുവരി 15 ന് പുറത്തുവിടുമെന്നും അദ്ദേഹം പ്രഖ്യാപിച്ചു കഴിഞ്ഞു.
