CNA
കൊച്ചി:
ഗോവയില് നടക്കാനിരിക്കുന്ന 53മത് അന്താരാഷ്ട്ര ചലച്ചിത്രോത്സവത്തിന്റെ ഇന്ത്യന് പനോരമയിലേക്ക് തരുണ് മൂര്ത്തി സംവിധാനം ചെയ്ത ചിത്രം 'സൗദി വെള്ളയ്ക്ക' തെരഞ്ഞെടുക്കപ്പെട്ടു.
ഫീച്ചര് വിഭാഗത്തിലേക്കാണ് ചിത്രം തെരഞ്ഞെടുക്കപ്പെട്ടിരിക്കുന്നത്. ആകെ 25 ഫീച്ചര് സിനിമകളും 20 നോട്ട് ഫീച്ചര് സിനിമകളുമാണ് ചലച്ചിത്രോത്സവത്തില് പ്രദര്ശിപ്പിക്കുന്നത്. നവംബര് 20 മുതല് 28 വരെയാണ് ചലച്ചിത്രോത്സവം.
'ഓപ്പറേഷന് ജാവ' എന്ന ജനപ്രിയ ചിത്രത്തിന് ശേഷം തരുണ് മൂര്ത്തി സംവിധായകനാകുന്ന ചിത്രമാണ് 'സൗദി വെള്ളക്ക'. തരുണ് തന്നെയാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്.
ഉര്വശി തീയേറ്റേഴ്സിന്റെ ബാനറില് സന്ദീപ് സേനന് നിര്മ്മിച്ച ഈ ചിത്രത്തില് ലുക്ക് മാന് അവറാന്, സിദ്ധാര്ഥ് ശിവ, ബിനു പപ്പു, സുജിത്ത് ശങ്കര, ഗോകുലന്, റിയ സെയ്റ, ധന്യ, അനന്യ എന്നിവര്ക്കൊപ്പം ശക്തമായ പ്രാധാന്യത്തോടെയുള്ള വേഷങ്ങളില് ജൂനിയര് ആര്ട്ടിസ്റ്റ് വേഷങ്ങള് ചെയ്തിരുന്ന മലയാള സിനിമയിലെ ഒട്ടനവധി പ്രഗല്ഭ കലാകാരികളും കലാകാരന്മാരും അഭിനയിക്കുന്നു.
ഇതാദ്യമായിട്ടായിരിക്കും മലയാളത്തിലെ ഒരു മുഖ്യധാര ചിത്രത്തില് ഇത്രയധികം ജൂനിയര് ആര്ട്ടിസ്റ്റ് അഭിനേതാക്കള്ക്ക് കൂടി ശക്തമായ പ്രാധാന്യം നല്കി ഒരു ചിത്രം ഒരുക്കുന്നത്.
കൗതുകകരമായ കാസ്റ്റിംഗ് വിശേഷങ്ങള് കൊണ്ടും വ്യത്യസ്തമായ തിരക്കഥാരചനയുടെയും ചിത്രീകരണ ശൈലിയുടെയും പേരില് ഇതിനോടകം ശ്രദ്ധ നേടിയ ചിത്രമാണ് 'സൗദി വെള്ളക്ക'.
ഏകദേശം ഇരുപതോളം വക്കീലന്മാര്, റിട്ടയേര്ഡ് മജിസ്ട്രേറ്റുമാര്, നിരവധി കോടതി ജീവനക്കാര് എന്നിവരുടെ സഹായത്തോടെയാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. പോലീസ് സ്റ്റേഷന് രംഗങ്ങളുടെ പൂര്ണ്ണതക്കു വേണ്ടി പോലീസ് ഓഫിസര്മാരുടെ സഹായവും സൗദി വെള്ളക്ക ടീം തേടി.
ഈ സിനിമ ഷൂട്ട് ചെയ്യുന്ന സമയത്തും ലൊക്കേഷനില് വക്കീലന്മാര് ഉണ്ടായിരുന്നു. ഇതിലെ കോടതി രംഗങ്ങള് യാഥാര്ഥ്യത്തോട് ഏറ്റവും അടുത്ത് നില്ക്കുന്ന തരത്തില് അവതരിപ്പിച്ചിട്ടുണ്ട്. കൊച്ചിയിലും പെരുമ്പാവൂരിലുമായാണ് ചിത്രീകരണം പൂര്ത്തിയാക്കിയത്. ഹരീന്ദ്രന് ആണ് ചിത്രത്തിന്റെ സഹ നിര്മാതാവ്.
നിഷാദ് യൂസഫ് ചിത്രസംയോജനം നിര്വഹിക്കുന്ന ഈ ചിത്രത്തിന് സംഗീതം ഒരുക്കുന്നത് പാലി ഫ്രാന്സിസ് ആണ്.
ശരണ് വേലായുധന് ആണ് ചിത്രത്തിന്റെ ഛായാഗ്രഹകന്.
ശബ്ദ രൂപകല്പന: വിഷ്ണു ഗോവിന്ദ്, ശ്രീ ശങ്കര് (സൗണ്ട് ഫാക്ടര്), ശബ്ദമിശ്രണം: വിഷ്ണു ഗോവിന്ദ് (സൗണ്ട് ഫാക്ടര്), രചന: അന്വര് അലി, ജോ പോള്, എക്സിക്യൂട്ടീവ് പ്രൊഡ്യൂസര്: സംഗീത് സേനന്, കളറിസ്റ്റ്: ലിജു പ്രഭാകര്, കലാസംവിധാനം: സാബു മോഹന്, വസ്ത്രാലങ്കാരം: മഞ്ജുഷ രാധാകൃഷ്ണന്, ചമയം: മനു മോഹന്, പ്രൊഡക്ഷന് കണ്ട്രോളര്: ജിനു പി.കെ, ചീഫ് അസോസിയേറ്റ്: ബിനു പപ്പു, സ്ക്രിപ്റ്റ് അസിസ്റ്റന്റ്: ധനുഷ് വര്ഗീസ്, കാസ്റ്റിംഗ് ഡയറക്ടര്: അബു വളയംകുളം, സ്റ്റില്സ്: ഹരി തിരുമല, പരസ്യകല: യെല്ലോ ടൂത്ത്.
Online PR - CinemaNewsAgency.Com