സി എന്‍ എ-
ചെന്നൈ:
ഇന്ത്യന് സിനിമയിലെ പ്രശസ്ത സംവിധായകരിലൊരാളായ ശങ്കറിന്റെ പുതിയ സിനിമയില്‍ തെലുങ്കിലെ യുവ താരങ്ങളായ രാം ചരണ്‍, പവന്‍ കല്യാണ്‍ എന്നിവര്‍ തുല്യ പങ്കാളിത്തമുള്ള നായക കഥാ പാത്രങ്ങളെ അവതരിപ്പിക്കും.
ബാഹുബലിക്ക് ശേഷം രാജമൗലി സംവിധാനം ചെയ്യുന്ന ആര്‍ആര്‍ആറിന് ശേഷം ടോളിവുഡില്‍ ഏറ്റവുംകൂടുതല്‍ ചര്‍ച്ച ചെയ്യപ്പെടുന്ന ബിഗ് ബജറ്റ് ചിത്രമായിരിക്കും ഇത്.
ദക്ഷിണേന്ത്യയിലെ സ്റ്റാര്‍ സംവിധായകനായ ശങ്കറിന്റെ സിനിമയില്‍ രാം ചരണ്‍, പവന്‍ കല്യാണ്‍ എന്നിവര്‍ ഒരുമിച്ച് അഭിനയിക്കുവെന്നതും ശ്രദ്ധേയമാണ്.
തൊണ്ണൂറുകളില്‍ ശങ്കര്‍ ഒരുക്കിയ സിനിമകള്‍ക്ക് ശക്തമായ കഥയുടെ പിന്‍ബലം ഉണ്ടായിരുന്നു. പിന്നീട് വന്ന സിനിമകളില്‍ കഥയെക്കാള്‍ ഉപരി സാങ്കേതിക സംവിധാനങ്ങള്‍ക്കും ഗ്രാഫിക്‌സിനും അമിതപ്രാധാന്യം നല്‍കുകയായിരുന്നു. ഇപ്പോള്‍ ഈ സിനിമയിലേക്ക് വരുമ്പോള്‍ പഴയ കാലത്തിലേക്കുള്ള ഒരു തിരിച്ചുപോക്കാണ് ശങ്കറിന്റെ ഭാഗത്തുനിന്ന് ഉണ്ടാകുന്നത്.
പുതിയ സിനിമയില്‍ കഥയാണ് താരം. തിരക്കഥയ്ക്കാണ് പ്രാധാന്യം. ശക്തമായ ഒരു തിരക്കഥയില്‍ നിന്നുകൊണ്ടാണ് ശങ്കര്‍ പുതിയ സിനിമ ഒരുക്കുന്നത്.
സൂപ്പര്‍ഹിറ്റ് വിജയം നേടിയ കമല്‍ഹാസന്‍ ശങ്കര്‍ കൂട്ടുകെട്ട് ഒരുക്കിയ 'ഇന്ത്യന്' എന്ന സിനിമയുടെ രണ്ടാം ഭാഗം കമല്‍ ഹാസന്റെ തിരക്കേറിയ രാഷ്ട്രീയ പ്രവര്‍ത്തനം കാരണം പാതി വഴിയില്‍ നില്‍ക്കുകയാണ്. അതേസമയം ഇന്ത്യന് മുമ്പ് ഈ സിനിമ പൂര്‍ത്തിയാക്കാനാണ് ശങ്കറിന്റെ ശ്രമം.
