സി എന്‍ എ-
ഹൈദരാബാദ്:
വില്ലന്‍ വേഷങ്ങളില്‍ തിളങ്ങിയ നടന്‍ സോനു സൂദിന്റെ പേരില്‍ അമ്പലം പണിത് ആരാധകര്‍. തെലങ്കാനയിലെ സിദ്ദിപേട്ട് ജില്ലയിലെ ഡബ്ബ താന ഗ്രാമത്തിലാണ് നടന്‍ സോനു സൂദിന്റെ പേരില്‍ ആരാധകര്‍ അമ്പലം പണിതിരിക്കുന്നത്.
കോവിഡ് പകര്‍ച്ചവ്യാധിക്കിടയില്‍ സോനു സൂദ് പൊതുജനങ്ങള്‍ക്കായി ധാരാളം നല്ല പ്രവര്‍ത്തനങ്ങള്‍ ചെയ്യുന്നുണ്ടെന്ന് ജില്ലാ പരിഷത്ത് അംഗം ഗിരി കോണ്ടാല്‍ റെഡ്ഡി പറഞ്ഞു. 'അവന്റെ സല്‍പ്രവൃത്തികളാല്‍ കൊണ്ട് അവന്‍ ദൈവത്തിന്റെ സ്ഥാനം നേടി. അതുകൊണ്ടുതന്നെ സോനു സൂദിനായി ഞങ്ങള്‍ ഒരു ക്ഷേത്രം പണിതു. അവന്‍ ഞങ്ങള്‍ക്ക് ഒരു ദൈവമാണ്' എന്നും റെഡ്ഡി കൂട്ടിച്ചേര്‍ത്തു. എന്നാല്‍ ഇതൊന്നും താന്‍ അര്‍ഹിക്കുന്നില്ലെന്നായിരുന്നു സോനുവിന്റെ പ്രതികരണം.
സോനു സൂദിന്റെ വിഗ്രഹമുള്ള ക്ഷേത്രം ഞായറാഴ്ച ശില്‍പിയുടെയും പ്രദേശവാസികളുടെയും സാന്നിധ്യത്തില്‍ ഉദ്ഘാടനം ചെയ്തു. പരമ്പരാഗത വസ്ത്രം ധരിച്ച സ്ത്രീകള്‍ നാടന്‍ പാട്ടുകള്‍ ആലപിക്കുകയും ആരതി ഉഴിയുകയും ചെയ്തു.
കോവിഡ് കാലത്ത് സോനു സൂദ് നടത്തിയ സന്നധ പ്രവര്‍ത്തനങ്ങളുടെ ആദരവായി എസ് ഡി ജി സ്‌പെഷ്യല്‍ ഹ്യുമനറ്റേറിയന്‍ ആക്ഷന്‍ അവാര്‍ഡ് അദ്ദേഹത്തിന് നല്‍കി ഐക്യരാഷ്ട്ര സഭ ആദരിച്ചിരുന്നു.
