സി എന് എ-
ബംഗളൂരു:
വീരപ്പനെ കുറിച്ച് എഎംആര് പിക്ചേഴ്സ് നിര്മ്മിക്കുന്ന 'വീരപ്പന്: ഹങ്കര് ഫോര് കില്ലിങ്' എന്ന വെബ് സീരീസിന് കര്ണാടക കോടതിയുടെ താല്കാലിക വിലക്ക്.
വെബ് സീരീസ് റിലീസിന് ഒരുങ്ങിയിരിക്കുന്നതിനിടെയാണ് കര്ണാടക കോടതിയുടെ വിലക്ക്.
വീരപ്പന്റെ ഭാര്യ മുത്തുലക്ഷ്മിയാണ് വെബ് സീരീസിനെതിരെ കോടതിയെ സമീപിച്ചിരിക്കുന്നത്.
'കെട്ടുകഥകളും വ്യാജ വിവരങ്ങളും അടിസ്ഥാനമാക്കിയാണ് എഎംആര് മേധാവി എഎംആര് രമേശ് സീരീസ് ഒരുക്കിയിരിക്കുന്നതെ'ന്ന് മുത്തുലക്ഷ്മിയുടെ പരാതിയില് പറയുന്നു.
'ഈ വെബ് സീരീസ് തന്റെ വ്യക്തി ജീവിതത്തിലേക്കുള്ള കടന്നു കയറ്റവും ലംഘനവുമാകുമെ'ന്ന് മുത്തുലക്ഷ്മി പരാതിയില് പറയുന്നുണ്ട്.
'മുമ്പ് പലരും വീരപ്പനെ കുറിച്ച് സിനിമയെടുത്ത് പണം സമ്പാദിക്കുകയും തങ്ങളുടെ കുടുംബത്തെ അപമാനിക്കുകയും ചെയ്തിട്ടുണ്ട്. മുമ്പ് വീരപ്പനെ കുറിച്ചുള്ള സിനിമക്കെതിരെ ചെന്നൈ സിറ്റി സിവില് കോടതി മുതല് സുപ്രീംകോടതി വരെ സമീപിച്ചിരുന്നു. എന്നാല് ഒടുവില് സിനിമ നിര്മ്മിച്ചു കഴിഞ്ഞപ്പോള് തനിക്ക് 25 ലക്ഷം രൂപ നഷ്ടപരിഹാരം നല്കണമെന്നായിരുന്നു കോടതി വധി. ഇപ്പോള് ഈ വെബ് സീരീസ് തന്റെ ഭര്ത്താവിനെ കുറിച്ച് വരുമ്പോള്, തന്റെ കുടുംബം നിരന്തരം അപമാനിക്കപ്പെടുകയാണെ'ന്ന് മുത്തുലക്ഷ്മി പറയുന്നു.
വിലക്ക് ഏര്പ്പെടുത്തിയതോടെ യൂട്യൂബിലോ ഒടിടിയിലോ മറ്റ് സോഷ്യല്മീഡിയ പ്ലാറ്റ്ഫോമുകളിലോ ഈ വെബ് സീരീസ് റിലീസ് ചെയ്യാന് സാധിക്കില്ല.
അടുത്ത തവണ കേസ് പരിഗണിക്കുന്നതുവരെയാണ് കോടതി താല്കാലികമായി റിലീസിന് വിലക്ക് ഏര്പ്പെടുത്തിയിരിക്കുന്നത്. അഭിഭാഷകനായ പ്രവീണ് ഗൗഡയാണ് മുത്തുലക്ഷ്മിക്ക് വേണ്ടി കേസ് വാദിക്കുന്നത്.
ഫെബ്രുവരി 6ന് കേസ് വീണ്ടും പരിഗണിക്കും.