സി എന്‍ എ-
തിരു:
'ജനുവരി 22 2021 ...
രാവിലെ ഗാന്ധി ഭവന്റെ ടീം വന്നു വീട്ടില്‍ ... ചിരസ്മരണ എന്ന പരിപാടിക്കായി ഒരു ചിത്രീകരണത്തിന്...
പത്തു മണിക്ക് വരാം എന്നേറ്റ ഷൂട്ടിംഗ് ക്രൂ വന്നത് 11 മണിക്ക്... 9 മണിക്ക് വരാമെന്നേറ്റ മന്ത്രി വന്നത് 10 മണിക്ക് ആയതിനാലാണത്രെ ലേറ്റായത്...!
എനിക്ക് 12 മണിക്ക് പത്തനാപുരത്തേക്ക് പോകണം...!
അകാലത്തില്‍ ഇവിടം വിട്ടു പോയ തിരക്കഥാകാരന്‍ ഷാജി പാണ്ഡവത്തിനേയും, 'കരി', 'സൂഫിയും സുജാതയും' ഒക്കെ സംവിധാനം ചെയ്ത ഷാനവാസ് നരണിപ്പുഴയേയും പറ്റി ഞാന്‍ സംസാരിക്കുന്നത് അവര്‍ ചിത്രീകരിച്ചു... കുശലാന്വേഷണം കഴിഞ്ഞവര്‍ പോയി...
ഞാനും സിന്ധുവും 'Let me talk' ചാനല്‍ ഉടമ സുരേഷും കൂടി ഇന്ന് പത്തനാപുരം ഗാന്ധിഭവനില്‍ പോകയാണ്...
ഏറെ നാളിനു ശേഷം ടി പി മാധവന്‍ എന്ന എന്റെ മാധവേട്ടനെ കണ്ടു...
ഡബ്ബിംഗ് രംഗത്തെ താരമായിരുന്ന ചന്ദ്രമോഹന്‍ ചേട്ടനെ കണ്ടു...
കുഞ്ഞു കുട്ടി മുതല്‍ 85 വയസ്സു കഴിഞ്ഞ കാഥികനും, നടനുമായ തങ്കപ്പന്‍ ചേട്ടന്‍ വരെ 1500 ല്‍ അധികം പേര്‍ ജീവിക്കുന്ന ആ ദൈവത്തിന്റെ കൈയ്യൊപ്പുള്ള മണ്ണിലേക്ക് കടന്നുചെന്നപ്പോള്‍ മനസില്‍ വല്ലാത്ത നൊമ്പരമായിരുന്നു...! പക്ഷേ എന്റെ ചിന്തകളെത്തള്ളിക്കളയുന്ന ഒരു ലോകമായിരുന്നു എനിക്ക് കാണാനായത്...!
ഒരാളിന്റെ മുഖത്തു പോലും വിഷാദത്തിന്റേയോ.... മടുപ്പിന്റേയോ... നൊമ്പരത്തിന്റേയോ മുഖം അവിടെ കാണാനായില്ല... മടുപ്പിക്കുന്ന ആശുപത്രി മണമോ... ഓക്കാനം വരുന്ന ദുര്‍ഗ്ഗന്ധത്തിന്റേയോ.... പൊടി പടലമോ... ഒന്നുമില്ലാതെ... നല്ലൊരു പഞ്ചനക്ഷത്ര ഹോട്ടല്‍ അങ്കണത്തിലേക്കോ... പരിപാവനമായ ഒരു ഭക്തിഭൂമിയിലേക്കോ... കടന്നുചെന്ന പ്രതീതി...!
വാതായനത്തില്‍ ശരീരച്ചൂട് പരിശോധനയും, സാനിറ്റൈസര്‍ കൊണ്ടുള്ള കൈ തുടക്കലും ഒക്കെ കഴിയുമ്പോഴേക്കും സംഘാടകരുടെ ഒരു നിര തന്നെ കടന്നുവന്നു...!
സമൂഹവും സാമൂഹിക മാധ്യമങ്ങളും എന്ന വിഷയത്തില്‍ അടൂര്‍ സുഹൃത് വേദി നടത്തുന്ന സെമിനാര്‍ ഉത്ഘാടനം ചെയ്യാനായാണ് ഗാന്ധിഭവനിലേക്ക് എന്റെ വരവ്... ഏറെ നേരത്തേ ചെന്നത് ടി പി ചേട്ടനെ കാണണം... സുരേഷിന്റെ Let me Talk നായി ചേട്ടനോട് കുശലങ്ങള്‍ ചോദിക്കണം... ചന്ദ്രമോഹന്‍ ചേട്ടന്‍ കാണണം എന്നു പറഞ്ഞിരുന്നു... കാണണം... പിന്നെ, ഗാന്ധിഭവന്റെ ജീവാത്മാവായ പുനലൂര്‍ സോമരാജന്‍ എന്ന മഹാത്മാവിനെ പരിയയപ്പെടണം... എല്ലാം നടന്നു...!
പത്തനാപുരത്തെ സകലമാന പ്രാദേശിക പത്രപ്രവര്‍ത്തകരും സെമിനാറില്‍ പങ്കെടുക്കുന്നു എന്നത് എന്നെ ഏറെ സന്തോഷിപ്പിച്ചു...!
ഞാന്‍ വന്നതറിഞ്ഞ് മാധവേട്ടന്‍ ഇറങ്ങി വന്നു...!
കേരള ഗവര്‍ണര്‍ ആയിരുന്ന ജസ്റ്റിസ് സദാശിവം ഗാന്ധിഭവനില്‍ വരുമ്പോഴൊക്കെ വിശ്രമിക്കാനായി മാറ്റി വച്ചിരുന്ന VIP റൂമിലാണ് മാധവേട്ടന്റെ വാസം എന്ന അറിവ് എനിക്കുണ്ടാക്കിയ സന്തോഷം വിവരണാതീതമാണ്...!
സിന്ധു വാങ്ങി കരുതിയ തത്തപ്പച്ചനിറമുള്ള ഷര്‍ട്ടും സുരേഷിന്റെ വീട്ടില്‍ നെയ്ത ഒര്‍ജിനല്‍ കൈത്തറി കസവുമുണ്ടും നീട്ടിയപ്പോള്‍ അവിടെ വച്ച് കവര്‍ പൊട്ടിച്ച് ഷര്‍ട്ടിന്റെ നിറം കണ്ട മാധവേട്ടന്റെ സന്തോഷം കാണേണ്ടതായിരുന്നു... ചെത്തി നടക്കാന്‍ പറ്റിയ ഷര്‍ട്ട് എന്ന കമന്റും...!
അപ്പോഴേക്കും സോമരാജന്‍ സര്‍ എത്തി...! മുണ്ടും ഷര്‍ട്ടും പിടിച്ച് LKG കുട്ടിയെപ്പോലെ ചിരിച്ചു നില്‍ക്കുന്ന മാധവേട്ടനെ കണ്ടപ്പോള്‍ സോമരാജന്‍ സര്‍ അവിടുത്തെ ഫൊട്ടൊഗ്രാഫറെ വിളിച്ചു... ഇവരുടെ ഒരു പടമെടുക്ക്... മൂവരും ഉള്ളത്... അതു വേണ്ടായെന്ന നിലപാടൊന്നും അദ്ദേഹം അനുവദിച്ചില്ല... ഞങ്ങള്‍ക്ക് അതു വേണം...! പടമെടുത്തു... LET ME TALK നായി സംസാരിച്ചു മാധവേട്ടന്‍...! സെമിനാറിന്റെ ഉത്ഘാടനം നടത്തി... പത്രപ്രവര്‍ത്തക സുഹൃത്തുക്കളുടെ ചോദ്യങ്ങള്‍ക്ക് മറുപടികള്‍ പറഞ്ഞു... കാച്ചില്‍... മരച്ചീനി എന്നിവ പുഴുങ്ങിയത്... തൈരില്‍ ഇഞ്ചിയും കാന്താരിയും ഉടച്ച ചമ്മന്തി... ദോശയും ചപ്പാത്തിയും കടലക്കറിയും തേങ്ങാ ചമ്മന്തിയും ചക്കരക്കാപ്പിയും കഴിച്ച്, സെമിനാറിന് വന്ന പല്ലിശ്ശേരിയെ കൊട്ടാരക്കര വിട്ട് വീടെത്തുമ്പോള്‍ മണി 12.45...!
പിന്നാലെ ഗാന്ധിഭവനില്‍ നിന്നും കുറേ ചിത്രങ്ങള്‍ വന്നു വാട്ട്‌സ് ആപ്പില്‍...!
മറക്കില്ല ഞാന്‍ 2021 ജനുവരി 22നെ...
പൂരിപ്പിച്ചു തീര്‍ക്കാനാവാത്ത സമസ്യ പോലെ ഗാന്ധിഭവനിലേക്കുള്ള ഈ ആദ്യ യാത്ര എന്നെ പിന്തുടരും ഓര്‍മ്മയുള്ള കാലം മുഴുവനും...!
-ശാന്തിവിള ദിനേശ്
