സി എന് എ-
കൊച്ചി:
മമ്മൂട്ടിയും മഞ്ജു വാരിയരും ആദ്യമായി ഒന്നിക്കുന്ന 'ദി പ്രീസ്റ്റ്' എന്ന ഹൊറര് ചിത്രത്തിന്റെ ഏറെ ദുരൂഹതകള് ഒളിപ്പിച്ചുവെച്ച രണ്ടാം ടീസര് എത്തി. നവാഗതനായ ജോഫിന് ടി. ചാക്കോ തിരക്കഥ എഴുതി സംവിധാനം ചെയ്യുന്ന ചിത്രം പ്രേക്ഷകരെ ഭീതിയുടെയും ആകാംഷയുടേയും മുള്മുനയില് നിര്ത്തുന്നതായിരിക്കും എന്ന സൂചനയാണ് ടീസര് നല്കുന്നത്.
ചിത്രത്തില് മമ്മൂട്ടി എത്തുന്നത് ഒരു വൈദികന്റെ വേഷത്തിലാണ്. കൊലപതാകത്തെ സംബന്ധിച്ച് പ്രീസ്റ്റ് നടത്തുന്ന അന്വേഷണങ്ങളും പുതിയ ടീസറില് ഉള്പ്പെടുത്തിയിട്ടുണ്ട്. ചിത്രത്തിന്റെ ആദ്യത്തെ ടീസറിലും ഏറെ ദുരൂഹതയും സസ്പെന്സും ഒളിപ്പിച്ചുവെച്ചിരുന്നു.
തീര്ച്ചയായും 'ദി പ്രീസ്റ്റ്' പ്രേക്ഷകരെ പിടിച്ചിരുത്തുന്ന സസ്പെന്സ് ത്രില്ലറായിട്ടാണ് ഒരുക്കിയിരിക്കുന്നതെന്ന് വ്യക്തമാക്കുന്നതാണ് ഈ പുതിയ ടീസര്.
ആന്റോ ജോസഫ് ഫിലിം കമ്പനിക്കൊപ്പം ബി. ഉണ്ണിക്കൃഷ്ണന്, വി.എന് ബാബു എന്നിവരും നിര്മ്മാതാക്കളാക്കുന്ന ചിത്രമാണ് ഇത്.
മാര്ച്ച് നാലിനാണ് ചിത്രം റിലീസ് ചെയ്യാന് തീരുമാനിച്ചിരിക്കുന്നത്. മമ്മൂട്ടിക്കും മഞ്ജു വാര്യര്ക്കുമൊപ്പം 'കൈതി' ഫെയിം ബേബി മോണിക്ക, നിഖില വിമല്, ശ്രീനാഥ് ഭാസി, മധുപാല്, ജഗദീഷ് എന്നിവരും ചിത്രത്തില് പ്രധാന കഥാപാത്രങ്ങളെ അവതരിപ്പിക്കുന്നണ്ട്.
കഴിഞ്ഞ ജനുവരിയിലാണ് ചിത്രത്തിന്റെ ഷൂട്ട് ആരംഭിച്ചത്. പിന്നീട് കോവിഡും, ലോക്ഡൗണും മൂലം ഷൂട്ടിങ് നീണ്ടുപോകുകയായിരുന്നു. ഒടുവില് കഴിഞ്ഞമാസമാണ് പ്രീസ്റ്റിന്റെ ചിത്രീകരണം പൂര്ത്തിയാക്കിയത്.