CNA
തിരു:
കേരള സംസ്ഥാന ചലച്ചിത്ര അക്കാദമി ഭാരത് ഭവന്റെ സഹകരണത്തോടെ സംഘടിപ്പിക്കുന്ന ഫ്രൈഡേ ഫിലിം സ്ക്രീനിംഗിന്റെ ഭാഗമായി മാര്ച്ച് 24 വെള്ളിയാഴ്ച വിഖ്യാത ജാപ്പനീസ് സംവിധായകന് ഷോഹെ ഇമാമുറയുടെ 'ദ ബാലഡ് ഓഫ് നരയാമ' പ്രദര്ശിപ്പിക്കും. വൈകിട്ട് 6 മണിക്ക് തൈക്കാട് ഭാരത് ഭവനില് നടക്കുന്ന പ്രദര്ശനത്തിന് പ്രവേശനം സൗജന്യമായിരിക്കും.
1983ലെ കാന് ചലച്ചിത്രമേളയില് പരമോന്നത പുരസ്കാരമായ പാം ദി ഓര് ഇമാമുറയ്ക്ക് നേടിക്കൊടുത്ത ചിത്രമാണിത്. 1999ല് കൊച്ചിയില് നടന്ന നാലാമത് ഐ.എഫ്.എഫ്.കെയില് ഇമാമുറ റെട്രോസ്പെക്റ്റീവിന്റെ ഭാഗമായി പ്രദര്ശിപ്പിച്ച ഈ ചിത്രത്തെ ആസ്പദമാക്കി വിജയലക്ഷ്മി 'ഹിമസമാധി' എന്ന കവിത എഴുതിയിട്ടുണ്ട്.
ജപ്പാനിലെ മലയോരഗ്രാമത്തില് നിലനിന്നിരുന്ന പ്രാകൃതവും മനുഷ്യത്വഹീനമായ ഒരു ആചാരമാണ് ചിത്രത്തിന്റെ കഥാപശ്ചാത്തലം. 70 വയസ്സ് പൂര്ത്തിയായവരെ ഹിമമണിഞ്ഞു നില്ക്കുന്ന നരയാമക്കുന്നുകളില് കൊണ്ടുപോയി മഞ്ഞില് മരവിച്ച് മരിക്കാന് വിടുന്ന ആചാരം ഉബാസൂട്ട് എന്നാണ് അറിയപ്പെടുന്നത്. അനിവാര്യമായ വിധി ഏറ്റുവാങ്ങാന് സന്നദ്ധയായി കുടുംബജീവിതത്തിലെ അവസാനകടമകളെല്ലാം നിറവേറ്റാന് വേണ്ട ഒരുക്കങ്ങള് നടത്തുന്ന ഒറിന് എന്ന 69കാരിയുടെ കഥയാണിത്. 130 മിനിറ്റാണ് ചിത്രത്തിന്റെ ദൈര്ഘ്യം.