Editor: MM Kamath
കൊച്ചി:
ഭാവാര്ദ്രസുന്ദരങ്ങളായ നിരവധി ഗാനങ്ങള് നമുക്കു സമ്മാനിച്ച മലയാളികളുടെ പ്രിയങ്കരനായ സംഗീത സംവിധായകന് എം.എസ്. ബാബുരാജിന്റെ കൊച്ചുമകള് നിമിഷ സലിം മുത്തച്ഛന്റെ തട്ടകമായിരുന്ന പിന്നണി ഗാനലോകത്തേക്ക് ചുവടുവയ്ക്കുന്നു.
അനില് വി. നാഗേന്ദ്രന് സംവിധാനം ചെയ്യുന്ന 'തീ' എന്ന ചിത്രത്തില് ഉണ്ണി മേനോനോടൊപ്പം നിമിഷ പാടിയ 'ആവണിപ്പൊന്തേരു വന്നൂ...' എന്നു തുടങ്ങുന്ന അതീവ ഹൃദ്യമായ പ്രണയ ഗാനം വിശാരദ് ക്രിയേഷന്സിന്റെ യൂ ട്യൂബ് ചാനലിലൂടെ ഇന്ന് പുറത്തിറങ്ങി.
മലയാള സിനിമാഗാനശാഖയുടെ സുവര്ണകാലത്തെ അനുസ്മരിപ്പിക്കുന്ന ഗാനത്തിന്റെ രചന അനില് വി നാഗേന്ദ്രനും സംഗീതം രെജു ജോസഫുമാണ് നിര്വ്വഹിച്ചത്. സംഗീതപ്രധാനമായ 'തീ' എന്ന ചിത്രത്തില്, ഇഷ്ട ഗായകരില് ഒരാളായ ഉണ്ണി മേനോനോടൊപ്പം പാടാന് കഴിഞ്ഞതില് ആഹ്ലാദത്തിലാണ് നിമിഷ. നല്ലൊരു ഗാനം പാടാന് അവസരം നല്കിയ അനില് വി നാഗേന്ദ്രനോടും അതിനു കാരണക്കാരനായ ബഹുമുഖപ്രതിഭ കൈതപ്രം ദാമോദരന് നമ്പൂതിരിയോടും അകമഴിഞ്ഞ ചാരിതാര്ത്ഥ്യത്തിലാണ്, എം.എസ്. ബാബുരാജിന്റെ കുടുംബം.
നാലുവര്ഷങ്ങള്ക്കു മുമ്പ് കോഴിക്കോട് ബീച്ചില് ടൂറിസം ഓണാഘോഷത്തോടനുബന്ധിച്ച് നടന്ന സംഗീത പരിപാടിയില് നിമിഷ സലിം പാടിയ ഗസല് കേട്ടാസ്വദിച്ച കൈതപ്രം, വേദിയിലുണ്ടായിരുന്ന അനില് നാഗേന്ദ്രനോട് 'ബാബുക്കയുടെ കൊച്ചുമകള് എത്ര മനോഹരമായി പാടുന്നു! അനിലിന്റെ അടുത്ത ചിത്രത്തില് അവള്ക്കൊരു അവസരം കൊടുക്കാന് നോക്കണം' എന്നാവശ്യപ്പെടുകയും അനില് ഉറപ്പു പറയുകയും ചെയ്തു.
എം എസ് ബാബുരാജിനോടും കൈതപ്രത്തോടുമുളള ആദരവ് പ്രകടിപ്പിച്ചുകൊണ്ട് അനില് വി നാഗേന്ദ്രന് ചിത്രത്തിലെ ശ്രദ്ധേയമായ ഒരു ഭാവഗീതം തന്നെ നിമിഷയ്ക്കു നല്കി.
യൂ ക്രിയേഷന്സിന്റെയും വിശാരദ് ക്രിയേഷന്സിന്റെയും ബാനറില് അനില് വി. നാഗേന്ദ്രന് രചനയും സംവിധാനവും നിര്വഹിച്ച 'തീ'യില്, പട്ടാമ്പി എംഎല്എ മുഹമ്മദ് മുഹ്സിന് ആണ് നായകന് 'വസന്തത്തിന്റെ കനല്വഴികളില്' എന്ന ചിത്രത്തില് നായകനായിരുന്ന ഋതേഷ്, ഇന്ദ്രന്സ്, പ്രേംകുമാര്, വിനു മോഹന്, രമേഷ് പിഷാരടി, ഉണ്ണിമേനോന്, അരിസ്റ്റോ സുരേഷ്, ഉല്ലാസ് പന്തളം, കോബ്ര രാജേഷ്, 'തട്ടിയും മുട്ടിയും' ഫെയിം ജയകുമാര്, വി.കെ ബൈജു, പ്രസാദ് കണ്ണന്, സോണിയ മല്ഹാര്, രശ്മി അനില്, ഗോപന് കല്ഹാരം, ജോസഫ് വില്സണ് തുടങ്ങിയവരോടൊപ്പം കെ സുരേഷ് കുറുപ്പ് എക്സ് എം. പി, കെ. സോമപ്രസാദ് എംപി, സി ആര് മഹേഷ് എംഎല്എ, നാടകരംഗത്തെ ആചാര്യന് ആര്ട്ടിസ്റ്റ് സുജാതന്, ജീവകാരുണ്യ പ്രവര്ത്തകന് നാസര് മാനു, സാഹസിക നീന്തലില് ലോക റെക്കോര്ഡ് ജേതാവായ ഡോള്ഫിന് രതീഷ്, വനിതാ നേതാവ് സൂസന് കോടി, നാടന് പാട്ടിന്റെ കുലപതി സി. ജെ. കുട്ടപ്പന് തുടങ്ങിയ പ്രത്യേക വ്യക്തിത്വങ്ങളും ചിത്രത്തില് വേഷമിടുന്നു.
അനില് വി നാഗേന്ദ്രന് എഴുതിയ വരികള്ക്ക് രെജു ജോസഫ്, അഞ്ചല് ഉദയകുമാര്, സി ജെ കുട്ടപ്പന്, അനില് വി നാഗേന്ദ്രന് എന്നിവര് ഈണമിട്ട എട്ടു ഗാനങ്ങളുണ്ട് ചിത്രത്തില്.
ഉണ്ണി മേനോന്, ശ്രീകാന്ത്, സി ജെ കുട്ടപ്പന്, പി കെ മേദിനി, ആര് കെ രാമദാസ്, രെജു ജോസഫ് , കലാഭവന് സാബു, മണക്കാട് ഗോപന്, അരിസ്റ്റോ സുരേഷ്, ഉല്ലാസ് പന്തളം, ശുഭ രഘുനാഥ്, സോണിയ ആമോദ്, കെ. എസ്. പ്രിയ, റെജി കെ പപ്പു, കുമാരി വരലക്ഷ്മി തുടങ്ങിയവരാണ് ഗായകര്.
വിശാരദ് ക്രിയേഷന്സ് യൂട്യൂബ് ചാനലിലൂടെ പുറത്തു വിട്ട ഗാനങ്ങളെല്ലാം ഇതിനോടകം വൈറലായിക്കഴിഞ്ഞു. പോസ്റ്റ് പ്രൊഡക്ഷന് ജോലികളെല്ലാം കഴിഞ്ഞു റിലീസിനൊരുങ്ങുകയാണ് 'തീ'. വാര്ത്ത പ്രചരണം- എ എസ് ദിനേശ്.
Online PR - CNA.