അഞ്ജു അഷറഫ്-
കൊച്ചി:
ലോക സിനിമ ചരിത്രത്തില് അച്ഛനും മകനും ചേര്ന്ന് സംവിധാനം ചെയ്യുന്ന 'T സുനാമി' എന്ന ചിത്രം മാര്ച്ച് 11ന് റിലീസ് ചെയ്യും. നടനും സംവിധായകനുമായ ലാലും ലാലിന്റെ മകനും സംവിധായകനുമായ ലാല് ജൂനിയറും ചേര്ന്നാണ് സുനാമി ഒരുക്കുന്നത്. നര്മത്തിന് പ്രാധാന്യം നല്കി രസകരമായ മുഹൂര്ത്തങ്ങളിലൂടെ കടന്നുപോകുന്ന, ചിരിക്കാന് മാത്രമുള്ള ചിത്രമാണ് 'T സുനാമി' യെന്ന് തിരക്കഥാകൃത്ത് കൂടിയായ ലാല് പറഞ്ഞു.
വര്ഷങ്ങള്ക്കു മുമ്പ് ഇന്നസെന്റ് ചേട്ടനുമായുള്ള സൗഹൃദ സംഭാഷണത്തില് നിന്ന് ലഭിച്ച ഒരു സംഗതിയില് നിന്നാണ് സിനിമയുടെ കഥ രൂപപ്പെടുന്നത്. ലോക്ക് ഡൗണിന് മുമ്പ് ചിത്രീകരണം ആരംഭിക്കുകയും ലോക്ക് ഡൗണില് നിര്ത്തി വെക്കുകയും പിന്നീട് ഷൂട്ടിംഗ് പുനരാരംഭിക്കുകയും പൂര്ത്തിയാക്കുകയും മാര്ച്ച് 11ന് റിലീസ് തീയതി പ്രഖ്യാപിക്കുകയും ചെയ്ത ചിത്രമാണ് സുനാമി. സെക്കന്ഡ് ഷോ ഉണ്ടോ എന്ന് നോക്കിയല്ല സിനിമയുടെ റിലീസ് തീയതി നമ്മള് പ്രഖ്യാപിച്ചത്.
സെക്കന്ഡ് ഷോ ഇല്ലാത്തതു കാരണം സിനിമയുടെ റിലീസിംഗ് ഡേറ്റ് മാറ്റാനും നമ്മള് ശ്രമിച്ചില്ല. സിനിമ ഇല്ലാത്തതു കാരണം തിയറ്ററുകാര് അനുഭവിക്കുന്ന ബുദ്ധിമുട്ട് നമുക്കറിയാം. അതു മനസ്സിലാക്കി തന്നെയാണ് നേരത്തെ പ്രഖ്യാപിച്ച തീയതിയില് തന്നെ സിനിമ റിലീസ് ചെയ്യാന് ഉറപ്പിച്ചത്. സെക്കന്ഡ് ഷോ ഉണ്ടെങ്കിലും ഇല്ലെങ്കിലും മാര്ച്ച് 11ന് സുനാമി റിലീസ് ചെയ്യാന് തന്നെയാണ് തീരുമാനിച്ചിരുന്നതെന്ന് ലാല് പറഞ്ഞു.
മുകേഷ്, ബാലുവര്ഗീസ്, ഇന്നസെന്റ്, അജുവര്ഗീസ്, സുരേഷ് കൃഷ്ണ, സിനോജ് വര്ഗീസ്, അരുണ്, സ്മിനുസിജോ, ദേവിഅജിത്ത്, നിഷ മാത്യു, വത്സലാ മേനോന്, ശില്പ എന്നിവരാണ് 'T സുനാമി'യില് പ്രധാന കഥാപാത്രങ്ങളെ അവതരിപ്പിക്കുന്നത്.
പാന്ഡ ഡാഡാ പ്രൊഡക്ഷന്സിന്റെ ബാനറില് അലന്ആന്റണി നിര്മ്മിക്കുന്ന സിനിമയുടെ ചായാഗ്രഹണം അലക്സ് ജെ പുളിക്കല് നിര്വഹിക്കുന്നു. എഡിറ്റിംഗ്- രതീഷ് രാജ്.
മാര്ച്ച് 11ന് പാന്ഡ ഡാഡ റിലീസ് 'T സുനാമി' പ്രദര്ശനത്തിനെത്തിക്കും.