എഎസ് ദിനേശ്-
കൊച്ചി :
വിദ്യാരംഭം കുറിച്ച് വിജയദശമി നാളില്‍ 9 സിനിമകള്‍ക്ക് തുടക്കമായി. ഉണ്ണിമുകുന്ദന്‍ നായകനാവുന്ന വിഷ്ണു മോഹന്‍ സംവിധാനം ചെയ്യുന്ന 'മേപ്പടിയാന്‍' ഈരാറ്റുപേട്ടയില്‍ ഷൂട്ടിംങ് ആരംഭിച്ചു. രാജീവ് ഷെട്ടി സംവിധാനം ചെയ്യുന്ന ബിബിന്‍ ജോര്‍ജ്ജ്, ധര്‍മ്മജന്‍ ചിത്രമായ 'തിരിമാലി' എന്ന ചിത്രത്തിന്റെ പൂജ കൊച്ചിയില്‍ നടന്നു. പ്രശസ്ത താരം നമിതയെ പ്രധാധ കഥാപാത്രമാക്കി ആര്‍ വി രവി, മാത്യു സ്‌കറിയ എന്നിവര്‍ സംവിധാനം ചെയ്യുന്ന 'ബൗ വൗ' എന്ന ചിത്രത്തിന്റെ പൂജ തിരുവനന്തപുരത്ത് നടന്നു. കിരണ്‍ രാജ്, നിമിഷ നമ്പ്യാര്‍ എന്നിവരെ പ്രധാന കഥാപാത്രങ്ങളാക്കി സെന്നന്‍ സംവിധാനം ചെയ്യുന്ന 'കടല്‍ കുതിര' എന്ന ചിത്രത്തിന്റെ പൂജ വര്‍ക്കലയില്‍ നടന്നു.
സുരേഷ്‌ഗോപി അഭിനയിക്കുന്ന 250മത്തെ ചിത്രമായ 'ഒറ്റകൊമ്പന്‍'നും തുടക്കമായി.
റിലീസ് ചെയ്ത ഫസ്റ്റ് ലുക്ക് പോസ്റ്ററുകള്‍
ഫന്റാസ്റ്റിക് ഫിലിംസിന്റെ ബാനറില്‍ വിശാഖ് സുബ്രഹ്മണ്യവും അജുവര്‍ഗീസും ചേര്‍ന്ന് നിര്‍മ്മിക്കുന്ന 9MM ദിനില്‍ ബാബു സംവിധാനംചെയ്യുന്നു. ധ്യാന്‍ ശ്രീനിവാസന്‍ തിരക്കഥ എഴുതുന്ന ചിത്രത്തില്‍ മഞ്ജു വാര്യരും ധ്യാന്‍ ശ്രീനിവാസനും കേന്ദ്രകഥാപാത്രങ്ങളെ അവതരിപ്പിക്കും. സിനിമയുടെ ടൈറ്റില്‍ പോസ്റ്റര്‍ റിലീസ് ചെയ്തു. M Square സിനിമാസിന്റെ ബാനറില്‍ മുല്ല ഷാജി നിര്‍മ്മിക്കുന്ന 'മിഷന്‍ സി' വിനോദ് ഗുരുവായൂര്‍ തിരക്കഥ എഴുതി സംവിധാനം ചെയ്യുന്നു. 'മിഷന്‍ സി'യുടെ ടൈറ്റില്‍ പോസ്റ്റര്‍ റിലീസ് ചെയ്തു.
പോറസ് സിനിമാസിന്റെ ബാനറില്‍ പ്രേം കല്ലാട്ട് നിര്‍മ്മിക്കുന്ന 'ചക്കി' എന്ന സിനിമ ആസാദ് അലവില്‍ സംവിധാനം ചെയ്യുന്നു. വിശ്വം ക്രിയേഷന്‍സിന്റെ ബാനറില്‍ സജീവ് കളത്തിപ്പറമ്പില്‍ നിര്‍മ്മിക്കുന്ന 'പ്രേംനസീര്‍ കെയര്‍ ഓഫ് കെ.ജി നായര്‍'എന്ന സിനിമ വേണുഗോപന്‍ സംവിധാനം ചെയ്യുന്നു. 'പ്രേംനസീര്‍ കെയര്‍ ഓഫ് കെ.ജി നായര്‍' ടൈറ്റില്‍ പ്രകാശനം ചെയ്തു.
