അഞ്ജു അഷറഫ്-
കൊച്ചി:
'അയ്യപ്പനും കോശിയും' എന്ന ചിത്രത്തിന് ശേഷം പൃഥ്വിരാജിനെ നായകനാക്കി സച്ചി സംവിധാനം ചെയ്യാനിരുന്ന 'വിലായത്ത് ബുദ്ധ' എന്ന ചിത്രം സച്ചിയുടെ അസോസിയേറ്റായിരുന്ന ജയന്‍ നമ്പ്യാര്‍ സംവിധാനം ചെയ്യുന്നു.
'പ്രബലനും അബലനും തമ്മില്‍ ഒരു അപൂര്‍വ്വമായ ചന്ദനത്തടിക്ക് വേണ്ടി നടത്തുന്ന യുദ്ധത്തിന്റെ കഥയാണ് 'വിലായത്ത് ബുദ്ധ'. ഈ സിനിമ സംഭവിക്കുന്നതിനു പിന്നില്‍ ഉണ്ടായ ഒരുപാട് കാര്യങ്ങള്‍ പറയണമെന്നുണ്ട്. വാക്കുക്കള്‍ കിട്ടുന്നില്ല. മറ്റൊരവസരത്തില്‍ പറയാ'മെന്ന് നിര്‍മ്മാതാവ് സന്ദീപ് സേനന്‍.
'ഉര്‍വ്വശി തീയേറ്റേഴ്‌സ് അഭിമാനപുരസ്സരം അവതരിപ്പിക്കുന്ന ചിത്രമാണ് 'വിലായത്ത് ബുദ്ധ'. സച്ചിയേട്ടന്റെ പ്രിയ ശിഷ്യന്‍ ജയന്‍ നമ്പ്യാര്‍ സംവിധാനം ചെയ്യുന്ന ചിത്രത്തില്‍ പൃഥ്വിരാജ് മുഖ്യകഥാപാത്രത്തെ അവതരിപ്പിക്കുന്നു. എന്റെ ബാല്യകാല സുഹൃത്തുകൂടിയായ രാജുവിന്റെ കൂടെ ഞാന്‍ ചെയ്യുന്ന ആദ്യ ചിത്രം കൂടിയാണ് 'വിലായത്ത് ബുദ്ധ'. ഈ ചിത്രം സംഭവിക്കാന്‍ ഒരേയൊരു കാരണക്കാരന്‍ സച്ചിയേട്ടനാണ്. ഞങ്ങളെ എല്ലാവരെയും ചേര്‍ത്തു നിര്‍ത്തിയിട്ട് അദ്ദേഹം പോയി.
ഈ സിനിമ ഞങ്ങളുടെ കടമയാണെന്ന് വിശ്വസിക്കുന്നു.
ഇന്ദുഗോപനും രാജ് പിന്നാടനും ചേര്‍ന്നാണ് തിരക്കഥ എഴുതുന്നത്. ഛായാഗ്രഹണം ജോമോന്‍ ടി ജോണ്‍ നിര്‍വ്വഹിക്കുന്നു. ചിത്രസംയോജനം- മഹേഷ് നാരായണന്‍, സംഗീതം- ജെക്‌സ് ബിജോയ്, പ്രൊജക്റ്റ് ഡിസൈനര്‍- ബാദുഷ, കലാ സംവിധാനം- മോഹന്‍ദാസ്. ഇവരൊക്കെയാണ് സിനിമയുടെ പിന്നില്‍ പ്രവര്‍ത്തിക്കുന്ന മറ്റു പ്രധാന ടെക്‌നീഷ്യന്മാര്‍ സച്ചിയേട്ടന്റെ ഓര്‍മ്മകള്‍ക്ക് മുന്നില്‍ പ്രണാമം അര്‍പ്പിച്ചുകൊണ്ടാണ് സിനിമക്ക് തുടക്കമിടുന്നതെ'ന്നും നിര്‍മ്മാതാവ് സന്ദീപ് സേനന്‍ പറഞ്ഞു.
സൂപ്പര്‍ഹിറ്റ് വിജയം നേടിയ 'അയ്യപ്പനും കോശിയും' റിലീസ് ചെയ്ത് ഒരു വര്‍ഷം തികയുന്ന വേളയിലാണ് 'വിലായത്ത് ബുദ്ധ'യുടെ ഒരുക്കങ്ങള്‍ ആരംഭിച്ചിട്ടുള്ളത്. സിനിമയുടെ ഫസ്റ്റ് ലുക്ക് പോസ്റ്ററും റിലീസ് ചെയ്തു കഴിഞ്ഞു.
