എ എസ് ദിനേശ്-
കൊച്ചി:
ഈസ്റ്റര്‍ അമ്പത് നൊയമ്പ് ആരംഭത്തോട് അനുബന്ധിച്ച് പ്രശസ്ത സംവിധായകന്‍ പ്രമോദ് പപ്പന്‍ ദൃശ്യവല്‍ക്കരിച്ച ക്രിസ്ത്യന്‍ പ്രാര്‍ഥന ഭക്തിഗാന ആല്‍ബമായ
'കുരിശിന്റെ വഴി' (way of the cross) റിലീസ് ചെയ്തു.
പീയാര്‍ എക്‌സ്‌പോര്‍ട്ടേഴ്‌സിന്റെ നിര്‍മ്മാണത്തില്‍ പ്രശസ്ത സംഗീത സംവിധായകന്‍ ഔസേപ്പച്ചന്റെ സംഗീതത്തില്‍ റെവെറന്റ് ഡോക്ടര്‍ പ്രൊഫസര്‍ ജോണ്‍ മൂലന്‍ വരികളെഴുതി പ്രമുഖ പിന്നണി ഗായകനായ അമല്‍ ആന്റണിയും ഔസേപ്പച്ചനും ചേര്‍ന്നാണ് ഈ ഭക്തിഗാനമാലപിക്കുന്നത്.
വിശ്വാസികള്‍ സഹനത്തിന്റെയും പരിത്യാഗത്തിന്റെയും സ്മരണകളില്‍ നൊയമ്പ് പുണ്യത്തിന്റെ അന്‍പത് വിശുദ്ധ നാളുകള്‍ക്കു തുടക്കം കുറിയിക്കുമ്പോള്‍
ഈസ്റ്റര്‍ വരെയുള്ള അടുത്ത അന്‍പത് ദിവസക്കാലം അവരിലെ പ്രാര്‍ഥനയും വിശ്വാസവും പാകപ്പെടുത്തുന്ന മട്ടിലാണ് കുരിശ്ശിന്റെ വഴിയൊരുക്കിട്ടുള്ളത്.
നമ്മുടെ പാപങ്ങളെ പ്രതിയുള്ള യേശു നാഥന്റെ കുരിശു മരണവും ദുഃഖ വെള്ളിയും തുടര്‍ന്നുള്ള ഉയിര്‍പ്പും ഇങ്ങനെ കുരിശ്ശിന്റെ വഴിയിലൂടെ ഓരോ വിശ്വസിയെയും മാനസികമായി പ്രചോദിപ്പിക്കുന്ന രീതിയിലാണ് ഔസേപ്പച്ചന്റെ പാവനവും ഭക്തി സാന്ദ്രവുമായ സംഗീതം.
ആല്‍ബം റിലീസിനു ശേഷം ഇരുപത്തി എഴിനു വലിയ നൊയമ്പ് ആരംഭം മുതല്‍ ഈസ്റ്റര്‍ വരെയുള്ള ദിവസങ്ങളില്‍ തുടര്‍ച്ചയായി എല്ലാ ദിവസവും വൈകിട്ടു പള്ളികളില്‍ കുരിശ്ശിന്റെ വഴിയുടെ സംഗീതം ഭക്തി സാന്ദ്രമായി കേള്‍ക്കുന്നതായിരിക്കും.
യക്ഷമന്‍ തോട്ടത്തിലെ എന്ന ആരംഭ ഗാനം മുതല്‍ പ്രാര്‍ത്ഥനകളും ഒടുവിലെ സമാപന ഗാനവും ഉള്‍പ്പെടെ മുഴുവന്‍ പതിനാലു സ്‌റ്റേഷനുകളിലായാണ് ആല്‍ബം ഒരുക്കിട്ടുള്ളത്.
ഇതില്‍ കുരിശ്ശിന്റെ വഴി എന്ന പ്രധാന ഗാനം ആലപിച്ചിരിക്കുന്നത് അമല്‍ ആന്റണിയാണ് മറ്റു പ്രാര്‍ഥനകളും ഗാനങ്ങളിലും സംഗീത സംവിധായകന്‍ കൂടിയായ ഔസേപ്പച്ചന്റെ സാന്നിദ്ധ്യമുണ്ട്.
പുത്തന്‍ ദൃശ്യ സാങ്കേതിക മികവോടെയാണ് സംവിധായകന്‍ പ്രമോദ് പപ്പന്‍ 'കുരിശ്ശിന്റെ വഴി' നൂതന ശൈലിയില്‍ ദൃശ്യാവിഷ്‌ക്കാരം നിര്‍വ്വഹിച്ചിട്ടുണ്ട്.
കൂദാശ ഫലദായാകമായ പുതിയ കുരിശ്ശിന്റെ വഴിക്ക് എല്ലാവിധ പ്രാര്‍ഥന സ്‌നേഹ ആശംസകളും നല്‍കി സീറോ മലബാര്‍ സഭ മേജര്‍ ആര്‍ച്ച് ബിഷപ്പ് ബഹുമാന്യനായ മാര്‍ ജോര്‍ജ്ജ് കര്‍ദിനാള്‍ ആലഞ്ചേരി പിതാവും കുരിശ്ശിന്റെ വഴിയ്‌ക്കൊപ്പമുണ്ട്.
വാര്‍ത്ത- എ എസ് ദിനേശ്.
Online PR - CinemaNewsAgency.Com
