സി എന് എ-
കൊച്ചി:
കോവിഡ് കാലത്തെ മീറ്റിംഗുകളെല്ലാം ഓണ്ലൈനും വെര്ച്വലുമായപ്പോള് സിനിമയും വെര്ച്വലായി ചിത്രീകരിക്കാന് സാധിക്കുമെന്ന് തെളിയിച്ചിരിക്കുകയാണ് മലയാളിയായ യുവ സംവിധായകന് ദിപിന് ദാസ്.
കേരളത്തില് ഇരുന്നു കൊണ്ട് ദിപിന് ദാസ് 'ആക്ഷനും കട്ടും' പറഞ്ഞു. അതിനനുസരിച്ച് അരവിന്ദും അഞ്ജനയും പര്വണേന്ദുവും പിന്നെ ടോയ് പൂഡില് വര്ഗ്ഗത്തില് പെട്ട ബഞ്ചി എന്ന നായ്ക്കുട്ടിയും അമേരിക്കയിലിരുന്ന് അഭിനയിച്ചു.
അങ്ങനെ ബഞ്ചി എന്ന നായ്ക്കുട്ടിയെ നായകനാക്കി പ്രവാസി മലയാളി എടുത്ത 'യു & മി' എന്ന ഹ്രസ്വ ചിത്രം നവ മാധ്യമങ്ങളില് വയറലായിക്കഴിഞ്ഞു.
വളര്ത്തു നായയെ വീട്ടില് ഇരുത്തി പുറത്തേക്ക് പോകാന് ഒരുങ്ങുന്ന കുടുംബം. അവര് പുറത്തേക്കു പോകുമ്പോള്, തന്നെയും കൊണ്ടുപോകാന് ആഗ്രഹം പ്രകടിപ്പിക്കുന്ന നായക്കുട്ടി. നായക്കുട്ടിയെ ഗൗനിക്കാതെ കുടുംബം പുറത്തേക്ക് പോകുമ്പോള് മാസ്ക്കും കടിച്ചു പിടിച്ച് നായക്കുട്ടി ഓടിയെത്തുന്നു. മാസ്ക്ക് എടുക്കാത്തകാര്യം മറ്റുള്ളവര് ഓര്ത്തത് അപ്പോഴാണ്. പിന്നീട് തന്നെ കൊണ്ടുപോകാതെ വീട്ടുകാര് പോകുന്നത് ജനല് പാളികളിലൂടെ വിഷമത്തോടെ വീക്ഷിക്കുന്നതും അതിനുശേഷം കുടുംബം തിരികെ വന്ന് നാക്കുട്ടിയെയും പുറത്തേക്ക് കൊണ്ട് പോകുന്നു. അങ്ങനെ കുട്ടിയുടെ മടിയില് സ്നേഹത്തോടെ കിടന്ന് ബഞ്ചി കാറില് യാത്രചെയ്യുന്നു.
തിരുവനന്തപുരം സ്വദേശിയും കംപ്യൂട്ടര് എന്ജിനീയറും മജീഷ്യനുമായ വി.കെ. അരവിന്ദ് വര്ഷങ്ങളായി ഒഹായോയിലാണ് താമസം. പ്രസവിച്ചു ഒരു ആഴ്ച കഴിഞ്ഞപ്പോള് തന്നെ അമ്മയെ നഷ്ടപെട്ട ബഞ്ചിയെ അരവിന്ദന്റെ കുടുംബം ഏറ്റെടുക്കുകയായിരുന്നു.
ഒരു ദിവസം സൗഹൃദ സംഭാഷണത്തിനിടെ കഥാകൃത്തും തന്റെ സുഹൃത്തുമായ മനോജ് ഭാസ്കറിനോട് അരവിന്ദ് ബഞ്ചിയെ കുറിച്ചു സംസാരിക്കുകയും അങ്ങനെ ഉരുത്തിരിഞ്ഞു വന്ന കഥയും ചിത്രവുമാണ് 'യു & മി' എന്ന സിനിമ. ദിപിന് ദാസ് കേരളത്തില് ഇരുന്നു കൊണ്ട് പൂര്ണ്ണമായും അമേരിക്കയില് ഷൂട്ട് ചെയ്ത ചിത്രമാണിത്. ഏഴു മിനിറ്റ് മാത്രം ദൈര്ഘ്യമുള്ള ഈ ചിത്രത്തില് ഒരുമിനിറ്റ് വരുന്ന അതി മനോഹരമായ ഒരു ഗാനവുമുണ്ട്.
എസ്.ആര്. സൂരജ് സംഗീത സംവിധാനം ചെയ്ത ഗാനം എഴുതിയിരിക്കുന്നത് കവി പ്രസാദ് ഗോപിനാഥാണ്. ആലാപനം- ജി.എസ്. അരുണ്.
അരവിന്ദ് നിര്മ്മിച്ചിരിക്കുന്ന ചിത്രത്തില് അരവിന്ദും മകള് പര്വണേന്ദുവും കുടുംബ സുഹൃത്ത് അഞ്ജന എസ് നായരും ആണ് മറ്റ് അഭിനേതാക്കള്. പൂര്ണ്ണമായും കൊളംബസില് ചിത്രീകരിച്ച ചിത്രത്തിന്റെ നോര്ത്ത് അമേരിക്കന് ലോഞ്ചിങ് നടത്തിയത് വാവ സുരേഷ് ആയിരുന്നു.